اخبار مصر اليوم - السيسي عن التعدي على أراض الدولة: «والله العظيم أنا ما أسيب لابني جنيه»

شدد الرئيس عبدالفتاح السيسي على ضروة إنهاء ظاهرة التعدي على أراض الدولة، قائلًا: «أنا شفت بالطيارة وأنا جاي كدة مزارع سمكية هناك، حد يقولي حجم المزارع قد ايه والعائد منها قد ايه وانتو خدتوا فلوسكم ولا ما اخدتوش، طيب أنا بقولكم بالمطلق كده يا مصريين اللى بتسمعوني، كل المزارع السمكية مش عايز اقول النسبة الغالبة منها، اللى توافق عليها من جانب الدولة ما بتدفعش ليه مش عارف، لا أنا عارف، لان الدولة مش موجودة».

أضاف خلال افتتاح مشروعات الصوب الزراعية في قاعدة محمد نجيب العسكرية، السبت: «أنا اديتك الكلام ده، وانت وافقت على تعاقد معايا بقيمة في منتهى التواضع اللى في الدنيا وبالتالي ليك وضع صحيح، بس انت ما بتدفعش المقابل بتاعها طيب ليه، طيب والناس القائمين على هذا الأمر ساكتين ليه، طيب أنا عرفت الكلام ده منين، عرفته من المنزلة، لما دخلت في بحيرة المنزلة علشان نضبط الدنيا هناك».

تابع: «يا ايهاب (اللواء إيهاب عبد الله مساعد رئيس الهيئة الهندسية للقوات المسلحة) هتنزلوا امتى في كينج مريوط بالكراكات لإن احنا مش هنعمل مزارع سمك في البحيرات، مش هنعمل الكلام ده، احنا بنعمل مية نظيفة جدا ونشيل كل العوائق وترجع المياه دي زي 200 سنة فاتوا، واللي انا أقوله لكم ده بتكاليف هائلة احنا بندفعها من صحة ولادنا من المنتجات ال بتطلع دية، بندفعها من هدر القدرات الموجودة».

مضى قائلًا: «وهدر - خلي بالكم من التعبير اللي هقولهولكم - حالة الالتزام والانضباط للدولة تبقى دولة رخوة ما فيش سيطرة أي حد عايز يعمل أي حاجة يعملها، أقول تعبير تاني، أي حد عايز يياخد حاجة ياخدها، ولا احنا قاعدين نعمل ايه، والله العظيم أنا ما أسيب لابني جنيه أبني مش أي حد تاني، ولا نفسى حتى أصل هاخد ده حرام، انت مش واخد بالك، ده مش معناه ان انا راجل نزيه يعني وشريف لا لا، معناه ان أنا راجل عارف كويس قوي ان احنا ال بناخده ده حرام، وتروح تحج وتعمل عمرة وانت بتاخد مال مش بتاعك».